२०१८ कडून मी काय शिकलो ?

मित्रांनो, 2018 हे वर्ष माझ्यासाठी खूप महत्त्वाचं होतं. नेटभेट ई-लर्निंग सोल्युशन्स मध्ये अनेक नवीन सुधारणा झाल्या, नवीन कोर्सेस लॉंच केले. तसेच अनेक नवीन ठिकाणी सेमिनार देखील घेतले. यादरम्यान अनेक नवीन ओळखी झाल्या, नवे मित्र मिळाले आणि नवे ग्राहक देखील मिळाले.

या सर्वांमुळे 2018 मध्ये खूप काही शिकायला मिळालं आणि त्यामधून माझ्यामध्येच अनेक सुधारणा मला करता आल्या.

मित्रांनो, दरवर्षी मला काय नवीन शिकता आलं या की मी यादी करत असतो. यावर्षी देखील मी अशी यादी तयार केली आहे. आणि प्रथमच मी आपल्याबरोबर या स्वरूपात 2018 मध्ये मी काय शिकलो ते शेअर करत आहे.
​​

1. मी माझ्या वेळेबाबत अत्यंत काटेकोर असतो. यावर्षी मी त्याबद्दल अधिक जागृत झालो. आणि वेळेचा आणखीन योग्य वापर करायला शिकलो. मी मिटिंग मध्ये जाताना आधीच ही मिटिंग किती वेळा ची असणार ते ठरवून जायचो. आणि प्रत्येक मीटिंग किमान पंधरा ते वीस मिनिटे आधी संपवण्याचा प्रयत्न करायचो. त्यामुळे पूर्ण वर्षभरात मला बराच वेळ वाचवता आला.
2. कोणाकडूनही शिकता येतं. यावर्षी हा एक महत्त्वाचा धडा मी शिकलो. आपल्या संपर्कात आलेल्या प्रत्येक माणसा कडून काहीना काही शिकण्यासारखं असतं. त्यासाठी अगदी एक्सपर्ट किंवा ज्ञानी माणूसच पाहिजे असं नाही. अगदी बंद पडलेला घड्याळ देखील दिवसातून दोन वेळा बरोबर वेळ दाखवतं. आपण सतत शिकत राहण्यासाठी डोळे आणि मन उघड ठेवायचं असतं.
3. आपल्या आजूबाजूला कोणत्या प्रकारच्या लोक आहेत त्याबद्दल अत्यंत जागरुक रहा. आपल्या आसपासच्या लोकांच्या विचारांचा आपल्यावर खूप परिणाम होत असतो. त्यामुळेच जास्तीत जास्त अनुभवी आणि सकारात्मक लोकांबरोबरच वेळ घालवा. मी आवर्जून अशा काही लोकांना भेटायचो, त्यांना फोन करायचो, जगभरातील अनेक मोठ्या विचारवंतांचे व्हिडिओ बघायचो.
4. जेव्हा आपण आनंदी असतो तेव्हा च इतरांना आपल्या सोबत वेळ घालवायला आवडतो. अन्यथा नाही. म्हणून स्वतः आनंदी राहायला शिका. इतर कोणा मुळे आपण आनंदी होऊ शकतो हा विचार करू नका, त्याऐवजी माझ्यावरच इतरांना आनंदी ठेवण्याची जवाबदारी आहे असा विचार करा.
5. प्रत्येक यश किंवा अपयश आपल्याला दोन वेळा मिळतं. पहिल्यांदा आपल्या मनात आणि दुसऱ्यांदा प्रत्यक्षात. तेव्हा जे काही आपल्याला मिळवायचे आहे त्यासाठी मनाची जोरदार तयारी पाहिजे, आणि ते मिळालंच आहे अशी मनाची समजूत घालता आली पाहिजे. जो हे शक्य झालं तर प्रत्यक्षात यश मिळवणे फारसं कठीण जाणार नाही.
6. अभिमान आणि गर्व या मधली पुसटशी रेषा ओळखायला शिका. यावर्षी मी अगदी अनपेक्षित अशा अनेक व्यक्तींकडून बरंच काही शिकलो. मला जास्त माहिती आहे हा माझा समज अनेकांनी चुकीचा ठरवला. त्याबद्दल मी अत्यंत आभारी आहे. यासोबत मी जे काही मिळवलं ते माझ्यासाठी नसून, इतरांसाठी आहे ही भावना देखील मला वेगळ्या प्रकारे विचार करायला शिकवून गेली.

मित्रांनो, 2018 मध्ये मी हे सहा धडे शिकलो. मला खात्री आहे, तुम्हालाही अशा प्रकार च्या गोष्टी शिकायला मिळाल्या असतील. आपण थोडा वेळ थांबून त्यांची नोंद मात्र करत नाही. तेव्हा आजच, एका वहीमध्ये गेल्या वर्षी तुम्ही काय शिकलात हे लिहून काढा. जर तुम्ही वहीत लिहिलं नाही, तर ते मनात बिंबवलं जाणार नाही. माझ्या या सहा धडयांपैकी कोणता तुम्हाला जास्त उपयोगी वाटतो ते मला अवश्य कळवा ! धन्यवाद !

यशस्वी भव ! धन्यवाद !

सलिल सुधाकर चौधरी
नेटभेट ई-लर्निंग सोल्युशन्स
मातृभाषेतून शिकूया, प्रगती करूया 
​www.netbhet.com

---